Ask Me
السلام عليكم ورحمة الله وبركاته
أهلاً وسهلاً بالجميع 
الخميس الماضي 1/7 هجري 24\12ميلادي , كنت طالع مع ( 17 ) شخص من الزملاء لـ ( الدهناء ) وكان الجو جداً خيالي 
دخلنا الدهناء الساعة 9 تقريباً ( تبعد عن الرياض 100 ك.م تقريباً على طريق الدمام )وأصحاب السيارات وقفوا عشان ينسمون كفراتهم وكل واحد يضبط الأمور عشان ندخل السيارات كانت ( باترول – باثفايندر 2 – Fj ) وأنا كنت في الباثفايندر ودخلنا وكانت معي كاميرتي الموقرة اللي بأبيعها الظاهر 
وكان الطريق أول شيء كويّس الحمد لله .. يعني بدون طلعات ونزلات .. كان الطريق مستوي وخوينا اللي يسوق الباثفايندر الثاني بدأ بالتنطيل بالدهناء وكانت الأرض شادة شوي بسبب المطر
فمثلكم عارفين التنطيل بالرمال يعطي منظر حلو للسيارة من ورا بحكم الرمل اللي يطير 
أنا جاز لي المنظر وقلت نصوّر هالمنظر 
وفتحت الدريشة ع الآخر ولكنها ما تنزل كلها .. تنزل ثلاث أرباعها ثم توقف يعني ما تقدر تنزلها كلها
أنا نزلتها كلها وقلت للي يسوق ( هد شوي بأصور ياسر ) وشفت الطريق اللي قدام وكان مستوي
طلعت راسي ويدي اليسار كاملة إلى كتفي والكاميرا
فجأة وبغضون ثواني حسيت اني تقلبت يمين ويسار هههههههههه
وش صار ؟ 
صار انه فيه بالطريق مثولث بسيط ما كان واضح من بعيد يعني كانت نزلة خفيفة بس مو واضحة من بعيد .. 
أول ما طلعت راسي وكتفي والكاميرا وبعدها بثواني نزلت السيارة بالمنطقة هذه بدون ما أدري أنا وضرب راسي فوق ثم ضرب فكي تحت بالقزازة 
ومثل ما ذكرت كانت القزازة ما تنزل كلها .. تنزل فقط ثلاث أرباعها
يعني كان فيه طرف من الدريشة مرتفع
فـ ضرب فكي ( تحت الشفايف السفلية وفوق الفك السفلي , يعني بينهم بالضبط ) في القزازة , 
حسيت بألم شديد بصراحة .. أول شيء دوخة الضربة + فجأة + ألم في الفك + ألم تحت الأذن اليمنى
مشيت الأمر كأنه عادي بالبداية وما حصل شيء .. كمل ما عليك .. الأمر بسيط ان شاء الله
السيارة الثانية ( ياسر ) شافوني .. وعارفين ان الضربة مو خفيفة لأنهم شافوني وقتها .. وفجأة سبحان الله توقفت سيارتهم إجباري .. ووقف سليمان معاهم
وأتلمس تحت اذني وراسي ورقبتي الحمدلله ما حصل شيء
وأشوف يدي وكتفي كل شيء سليم الحمدلله
فجأة أشوف دم !
وين يجي منه ؟ ما أدري !
تلمست الفك ولقيت فيه جرح .. توقعته جرح بسيط أخذت منديل ونشفته وما زال ينزف .. نزلت المراية وشفت الجرح وحصلته عميق ( قطع يعني ) 
يعني مفتوح من داخل 
يعني الضربة على القزازة سببت قطع للجلد ( كأنه قطع بالسكين ) استغربت انه كيف قطع والقزازة مو حادة .. من الخوف رحت أشوف القزازة انكسرت أو لآ .. لا يكون شيء دخل وأنا ما أدري
ولكن الحمدلله ما فيه شيء ..
فـ كانت الفكرة اني آخذ سيارة من السيارات وأرجع للمستشفى عشان اعالجها ثم أرجع للشباب
لكن الحمدلله واحد كان معه شنطة اسعافات كاملة وعالجتها / حطيت عليها معقم مرتين وحطيت عليها بانديد وضغطت عليها عشان تلتأم والحمدلله مشت الأمور 
بعد نص ساعة .. المنطقة كلها دم .. ما زال ينزف .. برضه شلت البانديد وبعده مقعم ثم بانديد ثاني مع ضغط عشان يلتأم
المره الثالثة برضه ينزف بشكل أقل من أول .. شلت البانديد وحطيت معقم مرتين ومسحت الدم كاملاً وحطيت قطن صغير مع بانديد
والحمدلله المره هذه كانت أفضل من اللي قبل من ناحية الضغط والإلتئام والنزيف ..
طلعنا من الدهناء الليل الساعة 9.30 تقريباً و وصلت الرياض الساعة 11 ووصلت للمستشفى الساعة 11.30 وعقموها أفضل ونظفوها وكل شيء كويس الحمدلله
قلت للدكتور إذا فيه إمكانية فتحها عشان تعقمونها من داخل لا يكون فيها شيء بدون ما ندري لا قدر الله
قال لا ما يحتاج طالما التأمت ولا تحس بألم فالأمر ممتاز الحمدلله .. وإذا صار فيها شيء لا قدر الله بيكون فيه خرّاج بيكون ظاهر لك مجرد تضغط عليه ويطلع وتنظف المنطقة وبس ..
لكن لو جيت من أول شيء كان خيطناها لك ..
قلت الحمدلله
الاسعافات الأولية جابت نتيجة
" نعمتان مغبون فيهما كثير من الناس .. الصحة والفراغ "
الصحة تاج ..
كان الضحك مصدر ألم هههههه ولكن إذا ما قدرت أمسك نفسي من الضحك .. أضحك وأنا ضاغط ع الفك عشان ما يزيد الفتح
وكان الفطور والغداء بالطقاق آكله هههه لأنه المنطقة ما تسمح لي بالأكل بشكل مريح 
وهذه صور من الرحلة /
وبس 
حيّاكم الله
42 تعليق »
ماشالله طلعه منتازه
وفقتووو في اختياركم للمكان
هذي الطلعه ولا اااا بلاااااااااا
بس اهم شي ما خلوك تاكل تراب
زائر »
جورية .. حيّاكم الله
تفضلي الرابط
http://www.7ammil.com/upfiles/zuu60994.jpg
تركي .. حيّاك حبيبي .. المكان والجو والوقت جداً رائع
أعتبرها من أفضل الرحلات
لا الحمدلله كنت بعيد ههههه ما عليك 
زائر .. الله يسلمك يارب ..
الشر ما يجيك ياحبيبي .. شكراً لك.
اللـ آآآ ـه بر 
يالله من فضلك الجنّـه يهالجو ,
واللقطآت شي مستحيل يتكرر !
تبآرك ربّـي ,
والحمدلله ع السلآمه مصورّنا ^^”
الله يديم على الجميع الصحه والعآفيه ~
يآمال الجنّـه , . .
احمد السیار »
السلام علیكم هلا ابوعمر ماشاء الله طلعه موفقه
البحر الأزرق »
الشامخة »الحمد لله على سلامتكم ما تشوفون شر
عورني فكي وانا اقرأ الوصف ><
الجو والتصوير جميل جداً ماشاء الله
حفظكم الباري
جهّام »الحمد لله على السلامة .. وجعل ماجاك تكفير
درس لن ينسى 
… الطيحه حول ما تظلم العين ؟
وش العروق الليّ وصلتوها ؟ طبيتوا حومة النقيان ؟ والثرى وش ياصل عمقه ؟
حطبتوا أرطا 
!
إلى رحلات مُوفقة بإذن الله 
asma abdulrahman »
أميرة الشمس »
ماتشوف شر .. 
.:.
وصدق من قال :
البر بريره .:. والغثى بالديرة
ماشاء الله أعجبتني الصورة رقم 3 و الصورة رقم 8
بس تحتاج مكياج خفيف بالفوتوشوب وتطلع شيء ثاني ..
بالتوفيق ,, !
ديمه .. الله يسلمكم يارب .. على الجميع ان شاء الله
فعلاً الوقت كان روعة والمكان كان خيالي .. الحمدلله
حيّاكم الله
أحمد السيّــــار .. هلا والله وغلا فيك .. وينك يا نفر .. ؟ من زمان عنك والله .. مشتاقين
البحر الأزرق .. الله يسلمك يارب .. مشكور حبيبي , الشر ما يجيك ان شاء الله
حيّاك الله ..
الشامخة .. جزاكم الله خير .. فعلاً كان موقف مزري , لكن الحمدلله عدّ على خير
حيّاكم الله ..
المكان والوقت الحمدلله وفقنا فيه ..
سـأعود للبقية ,
حمدلله على سلامتكم , الله يجعله آخر الشر ..
مغآمرة ولا أروع ..
والتصوير شئ ثآني أعجبتني الأولى أكثر شئ والأخيره ..
” يالبر لك شوق .. أحسن شئ البر الفاضي .. موب بر الثمآمه :/ ”
موفقين ~
حلمـ لمـ يكتملـ »حمداًلله على سلامتكُم
ماشاء الله صور تفتح النفس للبر 
بس ودي أسأل وش نوع الكاميرااللي تصور فيها؟وهل تنصحني بشِرائها؟
سموت بالدين »
سيدرا »جهّام .. الله يسلمك يارب
فعلاً درس لن ينسى .. والله العروق والحومات ما أعرف ولا شيء عنها
الله يسلمك يارب .. شكراً لك
جزاك الله خير
الأرطا الظاهر هي اللي جابوها الشباب .. مالي خبرة فيها
لكن مو مره واجد .. شيء خفيف
أسماء عبدالرحمن .. الله يسلمكم يارب .. شكراً لكم
فعلاً وقتها كان البر فاضي جداً
حيّاكم الله
أميرة الشمس .. الله يسلمكم يارب
فعلاً .. شيء أهون من شيء .. وجت سليمة الحمدلله
حيّاكم الله
الفارس الملثم .. يبلغ
آنسة ملعقة .. الشر ما يجيكم ان شاء الله
جزاكم الله خير
البر ممتع خصوصاً إذا توافق الجو مع الوقت مع المكان مع المجموعة ..
حيّاكم الله
عبدالعزيز الهميلي .. الله يسلمك يا رب يا حبيبي 
أما خوذة .. قوية والله 
الفراس الملثم .. المسابقة انتهت وأعلن عن جوائزها منذ شهر تقريباً
شكلك نايم للحين 
أبو إبراهيم .. زين انك علمتني عشان ما أركب معك ههههههههههه
لي عودة للبقيّة ان شاء الله
[ نبراس ] »
ماشاء الله تبارك الله
الصور تحمس ع الطلعه مرررة
سلامات ماتشوف شر وكل شي باجره ياخوي
لازم نتذكر الطلعات الحلوة بشي له أثر (كــ فكك تماماً)
الله يكفيك شر الضربات القوية
والله اقرا الموضوع وشادة على فكي
وحلوة الاسعافات الاولية دايم بالسياره ..انا اذكر انها دايم بالسياره واذا احتجناها نكون ناسينها بالبيت
بالتوفيق لطلعات اخرى مصورة
وقدامك العافيه
أطيــآف »
فارس »وعليكم السلام ورحمة الله وبركاته
الصراحه جــو خيــااالي
وماشاءالله باين أنها رحله مـمـتـعـة
والحمدلله على السلامه
مشكووور على التغطيه
(( 
))
نسيم الصباح .. شكراً لكم .. جزاكم الله خير
فعلاً الجو خيالي .. وكرهت الثمامة بصراحة بسبب زحمتها ..
الدهناء ممتازة جداً
ريشة تأبى العلو .. جزاكم الله خير .. حيّاكم الله
حلم لم يكتمل .. حيّاكم الله .. شكراً لكم
الكام كانت canon powershot s5 والله ممتازة للمبتدئين .. .. هي تعتبر بدائية في الإحتراف ..
حيّاكم الله
سموت بالدين .. أهلين
إن شاء الله
بائع الورد .. شكراً لك وشكراً لتواجدك .. حيّاك الله
نوّرت ..
سيدرا .. شكراً لكم .. حيّاكم الله
الله يعافيكم ..
لي عودة للبقية بحول الله
نبراس .. اي والله فك الله العين
حيّاك الله
حنان .. الله يسلمكم يارب .. فعلاً لابد من ذكرى لأي طلعة أو سفرة .. الزملاء اللي كنت معهم يعلقون أمس بـ طلعة الفك
والإسعافات الأولية فعلاً مهمة جداً .
حيّاكم الله
أطياف .. حيّاكم الله .. شكراً لكم
الله يسلمكم
فارس .. هلا والله وغلا فيك حبيبي .. منوّر يا باشا والله :$ أنت Roommate بـ بريطانيا مراحب فيك يا حبيبي
يبيلنا طلعة لها .. وإلا 
؟
حيّاك حبيبي .. منوّر والله
جوهرة الأمل »وعليكم السلام ورحمة الله وبركاته ..
حمداً لله على سلامتكم ، ولا بأس طهور إن شاء الله ،
ما شاء الله رحلة ممتعة ، ولقطات رائعـة ،
بورك فيكم ..
شهيدة القوقاز »أجواء ساحرة .،
* الي يطلع البر من دون إصابات ما كأنه كشت .،! والحمدلله على السلامة مجدداً
أبدعت بالصورة الـ 8 تبارك الرحمن ،
جوهرة الأمل .. الله يسلمكم يارب ..
جزاكم الله خير
حيّاكم الله ..
شكراً لكم.
شهيدة القوقاز .. قاعدة ان شاء الله ما تنطبق دائماً الله لا يجيب المصائب
ان شاء الله كل الطلعات تكون حلوة بدون إصابات
شكراً لكم
حيّاكم الله
تراتيل أنثى »الحمدلله على سلامتكم , الله يجعله آخر الشر ..
مغآمره حلوه :d
والصور شيّ ثآني مآشاء الله / الصوره 3 أعجبتني حيل !
بالتوفيق ..
نسائم السحر .. جزاكم الله خير .. آمين يارب .. وإياكم
حيّاكم الله
فن .. جزاكم الله خير .. حيّاكم الله
تراتيل أنثى .. الله يسلمكم يارب .. آمين وإياكم ..
فعلاً كانت مغامرة حلوة .. الحمدلله
شكراً لكم .
جزاكم الله خير ,
الحلى كله »
انـ غير ــا »,’
وعليكم السلام ورحة الله وبركااته
الحمدلله على السلامه ماتشوف شر ان شاء الله
رحله ممتعه ..وتصوير راااائع
والمكااااان ولا اروع
ماشاءالله تبارك الله
النـــوري ..~ »الحلى كله .. جزاكم الله خير .. شكراً لكم .
أنا غير .. شكراً لك أخوي .. الله يسلمك يارب
العفو وحيّاك الله
النوري .. جزاكم الله خير ..
شكراً لكم .
خلاصة "RSS" للتعليقات على هذه التدوينة. رابط التعقيبات "TrackBack"
شوّقتونا للبر :s
لا هنتم بغيت الصورة الثالثة بالحجم الطبيعي ممكن ؟
و الله يوسع صدوركم بالعافية …